បុរសពីរនាក់ បានជិះម៉ូតូឌុបគ្នាយ៉ាងលឿន ជ្រុលទៅបុករថយន្តមួយគ្រឿង កំពុងបត់ឆ្វេងឆ្លងផ្លូវ បណ្តាលឱ្យបុរសអ្នកជិះម៉ូតូម្នាក់ស្លាប់ភ្លាមៗ និងម្នាក់ទៀតរងរបួសស្រាល

ភ្នំពេញ ៖កាលពី ថ្ងៃទី១៥ ខែឧសភា ឆ្នាំ២០២៣ ត្រង់ចំណុចក្បែរស្ពានទី៦ តាមបណ្ដោយផ្លូវជាតិលេខ៦ ក្នុងសង្កាត់ព្រែកលាភ ខណ្ឌជ្រោយចង្វា រាជធានីភ្នំពេញ ។

នៅមុនពេលកេីតហេតុគេឃេីញរថយន្តមួយគ្រឿងម៉ាក FORD RANGER ពណ៌ស ពាក់ផ្លាកលេខ ភ្នំពេញ2BO-3069 បេីកបរដោយបុរសម្នាក់ធ្វើដំណើរតាមបណ្តោយផ្លូវជាតិលេខ៦ ក្នុងទិសដៅពីត្បូងទៅជើង ខណៈមកដល់ចំណុចកេីតហេតុ ក៏បានបត់ឆ្វេងឆ្លងទៅផ្លូវបេតុងជិតផុតទៅហើយ ក៏ស្រាប់តែមានម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៨ ពណ៌ខ្មៅ ពាក់ផ្លាកលេខ ភ្នំពេញ1GX-5919ជិះដោយបុរសពីរនាក់ឌុបគ្នាតាមបណ្តោយផ្លូវជាតិលេខ៦ ទិសដៅបញ្រ្ចាសគ្នាជាមួយរថយន្ត ក្នុងល្បឿនយ៉ាងលឿន រួចក៏បានជ្រុលទៅបុករថយន្តចំផ្នែកខាងក្រោយចំហៀងខាងស្ដាំពេញទំហឹង បណ្តាលឱ្យអ្នកបេីកបរម៉ូតូបែកក្បាលស្លាប់ភ្លាមៗ និងអ្នករួមដំណើររងរបួសស្រាល ។ ចំណែកឯម៉ូតូបានរងការខូចខាតផ្នែកខាងមុខយ៉ាងដំណំ រីឯរថយន្តបានក្រពឹតផ្នែកខាងក្រោយចំហៀងខាងស្ដាំ ។

ជនរងគ្រោះដែលស្លាប់មានឈ្មោះ ខន ដាវីត ភេទប្រុស អាយុ ១៩ឆ្នាំ មុខរបរជាងជួសជុលរថយន្ត។ ចំណែកឯជនរងគ្រោះដែលរងរបួសមានឈ្មោះ វិត ចិត្រា ភេទប្រុស អាយុ១៨ឆ្នាំ មុខរបរ កម្មកររោងចក្រ ពួកគេទាំងពីរនាក់មានស្រុកកំណើតនៅភូមិជេីងព្រៃ ស្រុកស្រីសន្ធរ ខេត្តកំពង់ចាម។

តាមសម្តីពីបុរសដែលរួមដំណើរជាមួយជនរងគ្រោះដែលស្លាប់បានឱ្យដឹងថា ពួកគេទាំងពីរនាក់ជាមិត្តភក្តិនឹងគ្នា ហេីយនៅមុនពេលកេីតហេតុ ពួកគេបានជិះម៉ូតូចេញមកពីលេងស្រុកកំណើតនៅខេត្តកំពង់ចាម ដោយបានជិះប្រញាប់ទៅធ្វើការនៅឯម្ដុំលូប្រាំ រាជធានីភ្នំពេញវិញ លុះជិះមកដល់ចំណុចកេីតហេតុក៏ជ្រុលទៅបុករថយន្តនេះតែម្ដង ៕