រញ្ជួយដី ៧.៤ រ៉ិចទ័រ ក្បែរប្រទេសឈីលី បង្កការព្រមានរលកស៊ូណាមិ និងជម្លៀសពលរដ្ឋ

(សាន់ត្យាហ្គោ)៖ គ្រោះរញ្ជួយដីដ៏ខ្លាំងមួយកម្រិត ៧.៤ រ៉ិចទ័រ បានវាយប្រហារតំបន់ Drake Passage ដែលនៅចន្លោះចុងទ្វីបអាមេរិកខាងត្បូង និងទ្វីបអង់តាក់ទិក ក្នុងជម្រៅរាក់ត្រឹមតែ ១០គីឡូម៉ែត្រ កាលពីថ្ងៃសុក្រ ទី២ ខែឧសភា បានបង្កឲ្យមានការគំរាមកំហែងពីរលកយក្សស៊ូណាមិ និងការបញ្ជាឲ្យជម្លៀសប្រជាជនចេញពីតំបន់ឆ្នេរនៃតំបន់ Magallanes ភាគខាងត្បូងបំផុតរបស់ឈីលី។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។
ទីភ្នាក់ងារគ្រោះមហន្តរាយ SENAPRED របស់ឈីលី បានចេញបញ្ជាឲ្យមានការជម្លៀសប្រជាជនចេញ ខណៈដែលប្រធានាធិបតី លោក Gabriel Boric បានសរសេរលើបណ្ដាញសង្គម X ថា «យើងកំពុងអំពាវនាវឲ្យជម្លៀសប្រជាជនចេញពីឆ្នេរសមុទ្រក្នុងតំបន់ Magallanes ទាំងមូល»។ ទន្ទឹមនឹងនេះ វិទ្យាស្ថានអង់តាក់ទិកឈីលី (INAHC) បានប្រាប់ Reuters ថា មូលដ្ឋាននៅតំបន់អង់តាក់ទិកក៏កំពុងត្រូវបានជម្លៀសចេញដែរ។
សេវាជលសាស្ត្រ និងមហាសមុទ្រឈីលី (SHOA) បានព្រមានថា រលកស៊ូណាមិអាចនឹងទៅដល់មូលដ្ឋាននៅអង់តាក់ទិក និងទីក្រុងនានានៅភាគខាងត្បូងបំផុតរបស់ឈីលី ក្នុងរយៈពេលប៉ុន្មានម៉ោងខាងមុខ។ រដ្ឋបាលមហាសមុទ្រ និងបរិយាកាសជាតិអាមេរិក (NOAA) បានព្យាករណ៍ថា រលកអាចមានកម្ពស់ពី ០.៣ ដល់ ១ម៉ែត្រ នៅអង់តាក់ទិក និងពី ១ ដល់ ៣ម៉ែត្រ នៅប្រទេសឈីលី។
គួរបញ្ជាក់ថា ប្រទេសឈីលី ស្ថិតនៅក្នុងតំបន់ដែលងាយរងគ្រោះដោយសារគ្រោះរញ្ជួយដី និងរលកស៊ូណាមិ ដោយសារទីតាំងរបស់ខ្លួននៅតាមបណ្តោយខ្សែក្រវាត់ភ្លើងប៉ាស៊ីហ្វិក៕